North Hunt verkefnið er hluti af stærra samnorrænu verkefni og fékk það styrk frá Norðurslóðaáætlun ESB (European
Commission´s Northern Periphery Programme). Markmið Norðurslóðaáætlunar ESB eru m.a. að hvetja til nýsköpunar og aukinnar samkeppnishæfni
í dreifbýli um leið og lögð er áhersla á sjálfbærni náttúru og samfélags. Þátttökuþjóðir
í North Hunt eru Finnland, Svíþjóð, Ísland, Skotland og Kanada. Í öllum NPP verkefnum er krafist þess að mótframlag komi
frá heimamönnum, sérstaklega frá atvinnulífinu en ekki akademískum stofnunum eða stjórnvöldum. Á þann hátt tryggir
sjóðurinn aðild frumkvöðla og starfandi einkafyrirtækja að verkefnunum enda markmiðið að þróa vöru eða hugmynd sem eflir
atvinnulíf á svæðunum og skilur eftir sig starfsemi sem eykur hagvöxt þeirra.
Flýtilyklar
Velkomin(n) á heimasíðuna okkar
Nýjustu fréttir
Áhugi á skotveiðitengdri ferðaþjónustu meðal sölu- og markaðsaðila erlendis
Mikill áhugi er á skotveiðitengdri ferðaþjónustu á Íslandi meðal sölu- og markaðsaðila í Evrópu ef marka má niðurstöður könnunar sem gerð var til að kanna markaðs- og framtíðarmöguleika skotveiðitengdrar ferðaþjónustu á norðurslóðum. Könnunin var gerð í tengslum við North Hunt verkefnið, sem er alþjóðlegt verkefni um þróun sjálfbærrar skotveiðitengdrar ferðaþjónustu á jaðarsvæðum á norðurslóðum. Jafnframt kom fram í könnuninni að þrátt fyrir þennan áhuga skorti söluaðila upplýsingar um hvað væri í boði í skotveiðum á Íslandi.
Niðurstöður könnunarinnar er að finna hér (á ensku)
Lesa meiraFyrsta North Hunt málstofan
FÉLAGSLEG SJÁLFBÆRNI SKOTVEIÐITENGDRAR FERÐAÞJÓNUSTU Á NORÐURSLÓÐUM: NORTH HUNT MÁLSTOFA 28.—29. SEPT. Í UMEÅ, SVÍÞJÓÐ
Fyrir hönd North Hunt verkefnisins bjóðum við ykkur velkomin á fyrstu North Hunt málstofuna sem haldin verður í Umeå,
Svíþjóð dagana 28.-29. september næstkomandi.
Yfirskrift þessarar ráðstefnu er félagsleg sjálfbærni og áhrif hennar á uppbyggingu skotveiðitengdrar ferðaþjónustu.
Ráðstefnunni er skipt niður í fjóra hluta:
- Félagsleg sjálfbærni skotveiðitengdrar ferðaþjónustu á norðurslóðum
- Sjálfbærni skotveiða og veiðiferðamennska
- Veiðiréttur og upplifun veiðimanna á eignarhaldi veiðilenda
- Umræður og niðurstöður
Málstofunni er ætlað að höfða til frumkvöðla í skotveiði og skotveiðitengdri ferðaþjónustu, sérstaklega frumkvöðla á norður-slóðum og annarra sem hafa áhuga á þessum málefnum eins og skotveiðimanna, landeigenda, rannsakendur, atvinnuráðgjafa og þeirra sem hafa umsjón með almennum veiðilendum.
Ef þið hafið frekari spurningar þá vinsamlegast snúið ykkur til Hjördísar Sigursteinsdóttur, netfang: hjordis@unak.is, sími: 460-8905.
Dagskrá málstofunnar er hægt að nálgast hér.
Þriðja fréttabréf komið út
Þriðja tölublað fréttabréfs North Hunt er komið út. í fréttabréfinu er meðal annars sagt frá fyrstu North Hunt málstofunni sem verður haldin í Umeå í Svíþjóð dagana 28.-29. september. Á ráðstefnunni verður fjallað um félagslega sjálfbærni og áhrif hennar á uppbyggingu skotveiðitengdrar ferðaþjónustu. Meðal annars efnis í fréttabréfinu er umfjöllun um stöðu skotveiðitengdrar ferðaþjónustu í Finnlandi og um stóra alþjóðlega ráðstefnu um félagsvísindi í dreifbýli í Evrópu, sem haldin var í Vaasa í Finnlandi fyrir skemmstu. Þar var meðal annars ein málstofa eingöngu um sjálfbærar skotveiðar.
Fréttabréfið má nálgast á rafrænu formi hér.
SJÁLFBÆRAR SKOTVEIÐAR - LEIÐIR TIL AÐ AUKA FJÖLBREYTNI STARFA Í DREIFBÝLI
